الحويجة
Ameni Oueslati - أماني الوسلاتي
نحكيلكم على جماعة يعسو على فلانة وين مشات وين جات
يسألوها فماش حويجة في الدخلات و الخرجات
''والحويجة ''تلاثة أنواع سيدي خويا
عروس يستر صبية، ولي العهد في الثنية والا زيادة في الشهرية
في بالها تقدمنا و الناس ما عادش تنهش في لحمنا
في بالها القراية تنور العقول موش ترجعنا لعهد أبو الهول
أما هي عاملة مولى الدار موش هوني
حويجتكم بطات و بجاه ربي سيبوني، أعتقوني، من مخكم خرجوني
ميسالش تقعد ضحكة بين اندادها أما نهار اخر توري اش قدمت لبلادها
منيرة وسميرة يستناو في الحويجة و برا عاد اش بش يسكت بهيجة
بهيجة هذي حبتها لولدها، قالت لا موش من ندها
ليوم السيد بدارو، بمرتو وصغارو
و هي في دار بوها إلي منو مائة خطبوها
نساو اللي الطفلة وردة تختار جنانها, لوحة تختار رسامها
كعبة غلة تشير لقاطفها، كمنجة تود عازفها
ما نعرفش كان فهمتوني
لازم تكونوا في بلاصتي بش تحسوني
الجماعة هاذم نساو اللي الطفلة روحها عزيزة
من صغرها الحرية فيها غريزة
... سيبوها، نفسوها و تلهاو بحاجة تنفعكم و تنفعوها
.ب س: جميع الأحداث و الشخصيات خيالية
أماني الوسلاتي
Website Design Brisbane