Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

التركينة

artistes-oud-talentsOumayma Rjeb - أميمة رجب

غادي في تركينة مالتراكنْ ؛

المخّ سارح و خيالك فيه ساكنْ ؛

ريت العود تذكّرت رنّات صوتكْ..

شمّيتْ ريحتك بين وراق الكتبّْ ؛

تذكّرت عينيكْ و هيّ تغزر للشتاء الّي تصبّْ ؛

و تقلّي غيرك يا بنيّة قلبي ما حبّْ ..

غادي في أكالتركينة ؛

تفكّرتكْ كي تبقى سوايع تختارْ ؛

أناهي من غنايات فيروز تبدى بيها النّهارْ ؛

كي تتبنّن كلّ كلمة ؛

كي تخرج تشمّ هواء الصّباح و تضحكلي ضحكة صغارْ؛

زينْ عمرو ما صارْ ..

أ كالتركينة كلّ شيّ فيها يذّكرني فيكْ ؛

الوهرة و الضّخامة و مزيّنتهم برشا فيانةْ ؛

تخشخيش الرّاديو و الغناية الّي شطحنا عليها متع أكالفنّانة نسيتهاَ ؛

نتفكّرعجبتني و غناية حبّنا سمّيتهاَ ..

غادي وانت شايخ في كتابك على أكالكرسي الأنتيكة ممدودْ ؛

و ريحة العنبر ماليا الدّنيا و همساتْ العودْ ؛

و زيدها الورد الجوري متع الخدودْ ؛ سبحانو شخلق المعبودْ  ..

غادي في أكالتركينة ؛

زيّنت بعينيك لياليّا الحزينة ؛

و ضوّيتلك الظّلمة بكلماتي الحنينة ؛

حكايات تكتبت و موزيكا تغنّات علينا ؛

و فوق القمرة بخيالاتنا مشينَا ..

غادي في أالكتركينة تخيّلتك ؛

و بشويّة تخربيش هاني وصفتكْ ؛

و بين كتبّتي في وسطها سكّنتكْ ؛

تخيّلتك ْ كي الحسّ عندي باتْ ؛

ويسلّم فمّ درويش كي قال ' و لنا في الخيالِ حياةْ ' ..

أميمة رجب
التركينة