بابا عندو ثلاثة بنيات, كل وحدة بلاصتها في قلبو خذات، أما بابا يقول كلو إلا الوسطانية, هذيكة ممو عينيا

,ليوم فرحتها, بابا فارح أما يخزرلها و سارح. أنا نعرف علاش. هذاك فيلم تعدى في مخو, من نهار إلي جات للدنيا للدقيقة هاذي

,تلقاه تفكر ليالي سهر عليها, تفكر كي كانت تحطو قدامها و تمشطلو شعرو. عمرو ما ينسى نهار إلي تجيبلو الكارني و الشهادة

,كبرت قدام عينيه فيسع و يحس في روحو ما شبعش بيها

كبر و قرى و ورى و ليوم بنتو عروسة, أزين صبية في عينيه

بابا ساكت أما بنتو الوسطانية تسمع في كلامو الكل. عينيه تحكي و توصي.

قاللها ربي يصونك و يسترك, انا إلي علي عملتو و ليوم نحبك تعمل على روحك,

بنتي راك داخلة دنيا جديدة عليك, نهار بش تضهرلك ساهلة و نهار بش تصعب عليك, نحبك قوية كيما ربيتك, نحبك مسؤولة كيما وريتك

كلام موش ساهل عليه, انا ريت الدمعة في عينيه

,بابا قدم باسها من جبينها, باسها على قد معزتها عندو و قاللها كبرت يا حلوفة ؟ مالحشمة ما جاوبتش و خرجوا شادتو من يدو

ما تمناش يسيبها أما لازمو يعطيها للي بعدو بش يصون قدرها. ولد الحلال إلي جاء خطبها و وعدو بش يستحفض على بنتو الوسطانية, بش يدللها و يهنينا كيما كانت في دار بوها

.بابا من يدو حطها في يد راجلها, فرحان و يتفاخر بيها. عارف إلي عطاها لقلب يحبها و رايدها

" ...الغناية جات قد قد "... هي هي, ما ناخذوها إلا هي, بنية بوها, أم الشعور الذهبية

.أنا نحبها الغناية و حتى بابا شطح عليها

.يزي ما خبيت عليكم، أنا هي البنية الوسطانية، إي نعم أنا هي بنت بوها إلي غناو عليها

.. بابا نحبك و راجلي زادة نحبك

بقلم

أماني الوسلاتي