Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

اقرب

reves-relationMaryem Ayari - مريم العياري

نسكت خير ماخيرش من سكاتي كان نتكلم يقولوا مهبولة تخرف في حكايات زمان و يلزمها الف عزام

ايجا اقرب ما تخافش منعملش معاك الدوني

اقرب شبيك بعيد متخافس لا نحبك و لا نكبش فيك .. ماو قتلك عايشة في حلمة قريب ننساها مالويل الي نتفس فيه ..اقرب لعل بكلامي معاك نتذكرها

ايجا نحكيلك حكايات صغري الي قريب ننساهم و على أحلامي الي كبرو معاهم ..

ايجا ندوروها شليلة و مليلة من باب سويقة للمدينة على ساقينا...بين النهج و النهج ناقفو و في كل تركينة نخطف بوسة و نعملو تصويرة

____________________________________

دار في وسط هالمدينة في نهج فارغ لا تسمع فيه قيل و لا قال و لا تفيق ع حكايات صارت البارح

دار مليانة نوار ..في كل تركينة تلقى قطاطس مش حس و بكى صغار..

ايجا اقرب خطوة و لا خطوتين نحكيلك كيفاه نحب عاشقي الي فيا ولهان ...

نحب عاشق يفيقني نص الليل و يبقى يخرفلي خاطر مجهوش نوم

نحب حد يقبلني كيما انا مش تصويرة لونها خيالو

كيما انا صعيبة،مغيارة و ساعات مسماسة

نحب حد يفهمني و يركز في العين الي معبية معاني

منحبش راجل حزار نخاف منو في عوض ما نخاف عليه

نحب راجل يحسسني ديما اني مازلت صغيرة ...منحبش نكبر و نخاف مالسنين الي تجري ...نخاف يولي همي كان دار و صغار

نحب راجل يخرجني في عز البرد و الشتاء تصب

نقزو و نهبلو و مانزوحو كان ما واحد منا يعطس مالريح الي بالقوي تهب

نحب راجل مغروم بالكتيبة و الكتب يسمع الجويني و بوشناق و نحبو ديما ليا مشتاق

نحبنا صحاب قبل مانكونو حباب

نحب التفاصيل و نعشق ريحة الورد و الياسمين

نحب العوج و الهرج ...نحب نطيح بسيد الرجال خاطر تعرف روحي نستحق...

ايجا اقرب متخافس لا نحبك و لا نكبش فيك

تمشيش تقول غارقة فيا لشوشة و من حبها فيا عقلها طار..ايجا نحكيلك على خاطر حالي فيا حار و عقلي شب لخلا و لبحار...تعبت ما لكلام مع الورقة و الستيلو الي كيفو مني طار ..مليت
الدمع الي في عيني سايل ، الضحكة الصفرا و القلب الحاير ..

و لا نقلك ايجا اقرب نوشوشلك في وذنيك نحكيلك حكايات فيهم كان انا و انتي ..نحكيلك قداش من ليلة حلمت بيك و نوريك وحشي ليك في تعنيقة نولو بيها واحد مش ثنين

نحكيلك على صوتك و ضحكتك الي بيهم مغرومةو لون عينيك الي بيهم مفتونة...نحكيلك على غيرتي عليك .

نغار ملي يراك ،يتبسملك و يضحك معاك ..منضهرش اما راني مغيارة ياسر عليك و يجوني لحظات نمرض بيك و نخليك ديما حذايا

شتحب تعمل حببتني فيك و الغموض الي بيناتنا قداش حلا هالحكاية...

ايجا ندوروها شليلة و مليلة من باب سويقة للمدينة على ساقينا...بين النهج و النهج ناقفو و في كل تركينة نخطف بوسة و نعملو تصويرة

ايجا اقرب شبيك ماشي و تهرب ايجا متاخذش على كلام الليل راو مدهون بالزبدة

ايجا متخافش لا نحبك و لا نكبش قيك

مريم العياري
اقرب