احترت و حار دليلي مفهمتش شنوة اللي صاير معايا ، نحب نقوم و منجمش .. نسكر الريفاي و بعد نقوم ممهمشة نجري لا فطور لا كعيبة التمر اللي مستانسة نرماها في فمي و انا نربط في خيوط السبادري ..

نخرج و انا نتفقد في مفاتحي و مش هاممني شنوه لبست لمهم خرجت مالدار ..معادش نحب نتمشا و نشوف الناس .. ناخو تاكسي من باب الدار للخدمة يزي .. اما منين ..مش كان جات عندي بسكلات ..اوف ..مش لازم ايا شطر الثنية تاكسي و الشطر لاخر كار حتى نوصل ..

نرمي هاك الفطور في الفريجيدار.. و القهوة .. بطلت ماعادش شاربتها .. شبيني . منعرش . ياخي هاك مسقمه يا طفله . اي اكيد سقام العرايس ههه علاه انت شمعرفو بيك هاذا .. صحيح انت واحده ميجيهاش لا سقام و لا زكام ترص فم و خمم شبيك هكا وليت .. ماوليتش .. انا شبيني . زعمة عاشقة لا مش صحيح ماهو جربتها مرة ها البيعة و طلعت مقطعة .. باهي انطق . منحبش نتكلم نحب نخليها لين تبان عليا ها الوحله اللي وحلتها .. شعملت زادة ..

زاد بيا الهبال و تقوا وليت نحب نطير و نجنح بعيد ها البلاصة مش سايعتني .. لا عاد مكفيني وقت ولا كلام و لا محبة و لا تفلسيف .. نحب نهرب معاك لبعيد . نهزك و نخبيك . علا شكون تحكي يا طفله . نحكي علي بلبزلي دنيتي و نرا فيه في روحي المزيانة .. نرا في الطفله الي ماتخافش و تقول و تتكلم و تواجه اما تضعف و تسكت و تدلل .. انت تخلبيزة اكبر من عمري اما محلاها خاطر نحاتلي الخوف  ..توه عرفتك و مازلت منعرفكش .. اما سايس على روحك يا طفله لا تغرق.. اش يفضها معاك ..