أحكيلي عليها ؛

ثبّت في عينيها ، قيت خيالك ؟

أسأل قلبها ، باح بأسرارك ؟

باهي كي تغزرلك ، تمهمشلك أفكارك ؟

تعرف بكلامها تحطّك فيها ؟ تعرف تنهيداتك تغنّيها ؟

أحكيلي عليها ؛

تبكي كي تتوحشك ؟ تعرف ترضّيك كي تغشّك ؟

كي تغمّض عينيها ، تراك ؟ تسرح في هواك ؟ و لا تنساك ؟

دقّات قلبها ، فيهم رنّة صوتك ؟

شمّ دبشاتها فيهم ريحة شونك ؟

أحكيلي ،

نحّات من لحمها و عطاتك ؟ تذوب في بنّة كلامك ؟ تسرق منها لحضاتك ؟؟

كي تكره روحك ؛ تعاود تعيشك عِشقتهَا من جديد ؟ هيّ زادة ادّاويك بلمسة لِيِدْ ؟

تي أحكيلي عليها شبيك ساكت؟ !

تكتبلك ؟ تتغزل بيك ساعات بكلام موش مفهوم ؟ سرقت مالسّما بلاصة و كتبتلك اسمك بين النّجوم ؟ هي زادة تموت كي تراك مهموم ؟ و لا تلوم ؟

أحكيلي قلّي ،

بنفس القوّة تغير عليك ؟ كي تحكي عليك للعباد شتقلّهُم ؟ شنوة تسمّيك ؟ هي زادة عايشة ليك ؟! .. تي قلّي ، حافضة بلاصة كل عرق فيك ؟ كي تجي تهرب ؟ بين ضلوعها تحبسك و

تخبّيك ؟ تي شبيك ! قلّي .. تعرف تفرّح لولد الصّغير الي عايش فيك ؟ ديما لازمك تتكلم و لا كيفي كي تسكت تحاور عينيك ؟ و كي متفهمكش تسأل حرارة يديك ؟ حُبّها ، يبرّد نار جواجيك ؟

..

أحكيلي عليها ،

كي شافوك في عينيها غارو منك امّاليها ؟ كي عثَرت اتكّيت عليها ؟ و هزّتك ؟ نقصد بكلامها ، بغزراتها بروحها الي ليك عطاتها ؛ ولا كي راتك عاجز عشرتك رماتها ؟ ..

قلّي ، تقلّك نحبّك و لا نتنفّسك ؟ تقلّك محلاك و لا مبنّك ؟ كي تمرض تبرا بحنِّك ؟.. تقلّك نحبّك كهو ؟ ريت ؟ .. باهي كي تقولها تنزل عال باء ؟ تنجّم كلمة منها اطيّرك في السّما ؟ عماتلك

عينك عالنّساء ؟ ، شقُلت ؟ لا ؟ ..

أحكيلي عليها ، اكذب و قلّي الّي انت فرحان بيها و الّي وجودك معاها يكفيها ؛ اكذب و قلّي الي انت مكش تلوّج على ذرّة منّي فيها ..

أحكيلي عليها ..