"آش بش يقولو علينا العباد؟ ".. الجملة اللي هدمت أجيال وبخرت احلام وحطمت قلوب وكبتت نفوس وخنقت أرواح..

تخلقنا في مجتمع ملي تحل عينيك يحكم عليك، من القابلة إلي تجيبك لوالديك وتقلهم "أيا ميسالش، هذاكا اش حب ربي، بنية".. وكان ذكر، من المسؤولية اللي بش تتحط على ظهرك من النهار الأول بصفتك "حامل اللقب"..

لبستنا نختاروها وأحنا نشوفو في ارواحنا في عينيهم قبل عينينا، خدمتنا نختاروها حسب كم البرستيج إلي فيها قبل محبتنا ليها ولا كسبنا فيها.. والعرس، العرس طاق وحدو كان نحلو لاما يتفرت تفريتة مزمرة..

شعب نحبو "التماهي مع الضوابط"، ولازمنا نشبهو لبعضنا، خاطر كي تخرج على السرب تتسربس عليك، الاختلاف عندنا صعيب وعواقبو وخيمة، عيب وحرام..

نعيشو ليهم، العينين إلي علينا، ونرضيو والدينا، نعيشو للناس الكل إلا لينا..

بين حكم العقل، وكلام الناس، وشنوة يلزم وما يلزمش، تضيع برشا حاجات مزيانة وبرشا حكايات تتعدى قدام عينينا..

إلي نعرفو هو انو مع العمر ينقص هاجس "اش بش يقولو" وتتولد فينا "خلي يقولو".. أما وقتاش بالضبط، وفي الوقت المناسب ولا لا، الله أعلم.. المهم، قبل منام عينو الواحد يحاول يفيق ويعيش لروحو، لا لأحد إلا لروحو.. النهار إلي يفوت يموت.. وهوما؟ هوما عمرهم ما يعجبهم حال، ديما بش يقولو..